შემოგთავაზებთ უგემრიელესი ტორტის, ,,თხუნელას“, რეცეპტს. შოკოლადის ფუმფულა ბისკვიტის, ბანანის არომატისა და ხაჭოს გემრიელი კრემის შერწყმა დესერტს განუმეორებელს ხდის.
ბისკვიტის მოსამზადებლად დაგჭირდებათ შემდეგი ინგრედიენტები:
- ფქვილი 200 გრ
- რძე 160 მლ
- შაქარი 100 გრ
- კვერცხი 2 ცალი
- ზეთი 80 მლ
- გამაფხვიერებელი 2 ჩ. კ.
- კაკაო 40 გრ
გულსართის მოსამზადებლად დაგჭირდებათ შემდეგი ინგრედიენტები:
- ხაჭო 300 გრ
- რძე 250 მლ
- შაქარი 100 გრ
- ჟელატინი 10 გრ
- ბანანი 4-5ცალი
მომზადების წესი:
- ამზადებთ ბისკვიტს. თასში აურიეთ გაცრილი ფქვილი, გამაფხვიერებელი და კაკაოს ფხვნილი.
- ცალკე თასში ათქვიფეთ კვერცხი და შაქრი, დაამატეთ რძე და ზეთი. მიღებულ მასას თანდათან შეაზილეთ ფქვილიანი ნარევი.
- გამოსაცხობად დაგჭირდებათ 17 სმ დიამეტრის ფორმა. ჩააფინეთ პერგამენტის ქაღალდი და მზა ცომი თანაბრად გაანაწილეთ.
- ღუმელი გააცხელეთ 180 გრადუს ტემპერატურაზე. გამოსაცხობად დასჭირდება 35-40 წუთი.
- ამზადებთ ხაჭოს სუფლეს. ჟელატინს დაასხით რძე და გააჩერეთ 30 წუთი. შემდეგ დადგით დაბალ ცეცხლზე, ურევთ განუწყვეტლივ, სანამ ჟელატინი არ გადნება. მასა არ აადუღოთ.
- შაქარი და ხაჭო ათქვიფეთ. შემდეგ ნელ-ნელა დაამატეთ ჟელატინიანი მასა (თბილი) და ათქვიფეთ.
- ბისკვიტი ფორმიდან გაგრილების შემდეგ ამოიღეთ. კიდედან 2 სმ დაშორებით, დაახლოებით, 1,5 სმ სიღრმეზე ამოჭერით შუაგული და კოვზით ნაზად ამოიღეთ. გაითვალისწინეთ, ძალიან ღრმად არ უნდა ამოჭრათ. ამოჭრილი ნაწილები დაფშხვენით.
- ბანანი გაფცქვენით, გაჭერით შუაზე და ჩააწყვეთ შუაგულში. შემდეგ დაფარეთ ხაჭოს სუფლეთი. წაუსვით ისე, რომ გუმბათის ფორმა მისცეთ. ზემოდან მოაყარეთ ბისკვიტის ნაფშხვენები და ტორტი, ,,თხუნელაც“, მზად არის.
- ტორტი გადაიტანეთ თავდახურულ კონტეინერში და მთელი ღამით შედეთ მაცივარში.
შეგიძლიათ ბანანი ჩაანაცვოთ მარწყვით. ხაჭოს სუფლეს ნაცვლად შეგიძლიათ გამოიყენოთ მოხარშული კრემი. გემრიელად მიირთვით!
