შემოგთავაზებთ შოკოლადის დესერტის რეცეპტს. შოკოლადის ფხვიერი ცომისა და ხაჭოს ნაზი არომატის შერწყმა საოცრად გემრიელ კომბინაციას ქმნის.
ცომის მოსამზადებლად დაგჭირდებათ შემდეგი ინგრედიენტები:
- 300 გრ ფქვილი
- 4 ს. კ. კაკაოს ფხვნილი
- 200 გრ კარაქი
- 100 გრ შაქარი
- 1 ჩ. კ. გამაფხვიერებელი
- ვანილი
შიგთავსის მოსამზადებლად დაგჭირდებათ შემდეგი ინგრედიენტები:
- 500 გრ ხაჭო
- 4 ს. კ. არაჟანი
- 3 ცალი კვერცხი
- 2 ს. კ. სახამებებლი
- 150 გრ შაქარი
- ვანილი
მომზადების წესი:
- ფქვილი, კაკაო, შაქარი, ვანილი და გამაფხვიერებელი აურიეთ.
- მაცივრიდან გამოღებული კარაქი გახეხეთ მსხვილ სახეხზე და ხელით შეურიეთ ფქვილის ნარევს.
- გულსართის მოსამზადებლად ხაჭოს დაამატეთ არაჟანი, კვერცხი და დააბლენდერეთ. შემდეგ დაამატეთ შაქარი, სახამებელი (სიმინდის ან კარტოფილის), ვანილი და აურიეთ ერთგვაროვანი მასის მიღებამდე.
- საცხობ ფორმაში, დაახლოებით 21 სმ დიამეტრის, ჩააფინეთ პერგამენტის ქაღალდი. ფქვილიანი მასა გაყავით ორ ნაწილად. ჯერ ნახევარი გაანაწილეთ ფორმაში და გააბრტყელთ. შემდეგ დაიტანეთ ხაჭოს გულსართი და თანაბრად გაანაწილეთ. ხაჭოს ფენა დაფარეთ დარჩენილი ცომით.
ღუმელი გააცხელეთ 180° ტემპერატურაზე. გამოსაცხობად დასჭირდება 40-45 წუთი. დესერტი ფორმიდან გაგრილების შემდეგ ამოიღეთ და გემრიელად მიირთვით.
