ქუსლებზე ნახეთქების გაჩენას იწვევს კანის გამოშრობა, სოკოვანი ინფექცია, მოუხერხებელი ფეხსაცმელი, კანის არასათანადო მოვლა, სინთეტიკური ქსოვილის წინდები.
ნახეთქები არ არის მარტო ესთეტიკური პრობლემა. ამ უსიამოვნო მდგომარეობას ახლავს აუტანელი ტკივილი.
გირჩევთ, არ დაუშვათ ქუსლებზე ნახეთქების წარმოქმნა. ამისთვის კი აუცილებელია ჰიგიენის დაცვა, კანის მოვლა, დატენიანება და პროფილაქტიკისთვის სხვადასხვა ნიღბების გამოყენება.
შემოგთავაზებთ შვრიის ბაზაზე მომზადებული ნიღბების რეცეპტებს. საოცრად ეფექტური ნიღბები არბილებს ქუსლების კანს, ანიჭებს სიგლუვეს, არ აძლევს კანს გამოშრობის საშუალებას და აგარიდებთ ნახეთქების წარმოქმნას.
რეცეპტი N1
ნიღაბის მოსამზადებლად დაგჭირდებათ შემდეგი ინგრედიენტები:
- დაფქული შვრიის ფანტელი 2 ს. კ.
- დაფქული ნუში 2 ს. კ.
- არაჟანი
მომზადების წესი:
დაფქულ შვრიას და ნუშს დაამატეთ იმ რაოდენობის არაჟანი, რომ მიიღოთ მალამოს მსგავსი მასა.
ფეხები ცოტა ხნით ჩაყავით ცხელ წყალში, შეიმშრალეთ და მომზადებული მასა შეიზილეთ ტერფებზე, განსაკუთრებული ყურადღება მოაქციეთ ქუსლებს. სამოქმედოდ დაიტოვეთ 20-25 წუთი. შემდეგ ფეხები დაიბანეთ თბილი წყლით და ქუსლები გაიხეხეთ პემზით, გადაივლეთ თბილი წყალი და წაისვით დამატენიანებელი საცხი.
რეცეპტი N2
მოცემული ნიღაბის მოსამზადებლად, პირველ რიგში, ამზადებთ შვრიის ფაფას.
მოსამზადებლად დაგჭირდებათ შემდეგი ინგრედიენტები:
- შვრიის ფაფა 6 ს. კ.
- ზეთი 2 ს. კ.
- თაფლი 1 ჩ. კ.
მომზადებისა და გამოყენების წესები:
- შვრიის ფაფას დაამატეთ ზეთი, თაფლი და აურიეთ.
- ფეხებზე გაიკეთეთ ცხელი წყლის აბაზანა, შეიმშრალეთ და შემდეგ წაისვით ნიღაბი. სამოქმედოდ დაიტოვეთ 15-20 წუთი.
- პროცედურის ბოლოს დაიბანეთ ფეხები, გაიხეხეთ პემზით, გადაივლეთ თბილი წყალი, შეიმშრალეთ და წაისვით დამატენიანებელი საცხი ან თქვენთვის ხელმისაწვდომი ზეთი და ამოიცვით წინდები.
- შვრიის ბაზაზე მომზადებული ნიღბები გაიკეთეთ კვირაში ერთხელ.
გაითვალისწინეთ მოცემული რჩევები, გამოიყენეთ შემოთავაზებული ამქერცლავი ნიღბები და დაივიწყეთ ქუსლების პრობლემები!
