შემოგვთავაზებთ ფუმფულა, ჰაეროვანი, შოკოლადის ბისკვიტის რეცეპტს. შოკოლადის ბისკვიტს ძალიან უხდება მოხარშული შესქელებული რძით მომზადებული კრემი და ნიგოზი ან შოკოლადის კრემი და კონიაკით დანამული ალუბალი. ეს თქვენს ფანტაზიასა და გემოვნებაზე არის დამოკიდებული.
შოკოლადის ბისკვიტის მოსამზადებლად დაგჭირდებათ შემდეგი ინგრედიენტები:
- კვერცხი 6 ცალი
- შაქრის ფხვნილი 150 გრ
- ვანილის ექსტრაქტი 1 ჩ. კ. ან ვანილი
- ფქვილი 120 გრ
- კაკაო 50 გრ
- კარაქი 40 გრ
მომზადების წესი:
- გაითვალისწინეთ, ყველა ინგრედიენტი ოთახის ტემპერატურის უნდა იყოს. კვერცხი გამოყენებამდე ნახევარი საათით ადრე ჩადეთ თბილ, და არა ცხელ, წყალში და დატოვეთ.
- ფქვილი და კაკო აურიეთ და გვერდზე გადაადეთ. კარაქი გაადნეთ და გააგრილეთ (გჭირდებათ ოთახის ტემპერატურის).
- მოამზადეთ 23-24 სმ დიამეტრის ფორმა და ჩააფინეთ ცხიმწასმული პერგამენტის ქაღალდი.
ბისკვიტის მომზადების წესი:
- კვერცხი და შაქარი ვანილთან ერთად კარგად ათქვიფეთ (იყენებთ მიქსერს). ფქვილისა და კაკაოს ნარევი გაყავით სამ ნაწილად და კვერცხიან მასას ნაწილ-ნაწილ დაამატეთ და ხის კოვზით ან სილიკონის ნიჩაბით ნაზად აურიეთ.
- ბოლოს დაამატეთ გამდნარი და ოთახის ტემპერატურის კარაქი და კიდევ ერთხელ კარგად აურიეთ.
- ცომი გადაიტანეთ მომზადებულ ფორმაში და ნიჩაბით თანაბრად გაანაწილეთ. გამოცხვიეთ 180 გრადუს ტემპერატურაზე 40 წუთის განმავლობაში. მზა ბისკვიტი ოდნავ გააგრილეთ და შემდეგ ამოიღეთ ფორმიდან.
ბისკვიტი გაყავით 2-3 ნაწილად. გამოიყენეთ თქვენთვის სასურველი კრემი და უგემრიელესი ტორტიც მზად არის.
