შემოგთავაზებთ ვარდის ფორმის უგემრიელესი ფუნთუშების რეცეპტს. მოცვის ან მოცხარის არომატით გაჯერებული ფუმფულა ცომით მომზადებული ფუნთუშები ფინჯან ჩაისთან ან ყავასთან ერთად კარგ განწყობას შეგიქმნით.
ფუნთუშების მოსამზადებლად დაგჭირდებათ შემდეგი ინგრედიენტები:
- ფქვილი 500 გრ
- შაქარი 150 გრ
- მშრალი საფუარი 1,5 ჩ. კ.
- რძე 100 მლ
- კვერცხი 3 ცალი
- კარაქი 85 გრ
- წითელი მოცვი ან თქვენთვის სასურველი ნებისმიერი კენკრა 2 ჩ. ჭ.
- მწიკვი მარილი
მომზადების წესი:
- პირველ რიგში, ამზადებთ საფუარს. თბილ რძეს დაამატეთ საფუარი, 2 ს. კ. ფქვილი, 2 ს. კ. შაქარი და აურიეთ ერთგვაროვანი მასის მიღებამდე. გადააფარეთ ტილო და ცოტა ხნით სითბოში დააყოვნეთ.
- ფქვილი გაცერით. კვერცხს დაამატეთ შაქარი, მარილი, დარბილებული კარაქი და კარგად ათქვიფეთ.
- მიღებულ მასას დაამატეთ მზა საფუვრიანი მასა, აურიეთ და ნელ-ნელა შეაზილეთ ფქვილი და მოზილეთ ფაფუკი ცომი, გადააფარეთ ტილო და 1 საათით დააყოვნეთ სითბოში. ცომი მოცულობაში 2-ჯერ მოიმატებს.
- მზა ცომი გადმოიტანეთ ფქვილმოყრილ მაგიდაზე და გაყავით თანაბარ ნაწილებად ისე, რომ გამოხელოთ პატარა გუნდები. გუნდები გააბრტყელეთ მრგვალად და თითოეულს კიდეზე 4 ჭრილი გაუკეთეთ. მიიღებთ ფორმას, რომელიც წააგავს ყვავილს ფურცლებით.
- ცომის შუაში ჩადეთ თქვენთვის სასურველი კენკრა, დაახლოებით 1 ჩ. კ. და შემოახვიეთ ჯერ პირველი ფურცელი, თან მოაყარეთ ცოტა შაქარი, შემდეგ პირველ ფურცელს შემოახვიეთ მეორე ფურცელი, თან მოაყარეთ ცოტა შაქარი, შემდეგ_მესამე, მეოთხე. შიგადაშიგ მოაყარეთ ცოტა შაქარი. საცხობ ფორმაზე დააფინეთ პერგამენტის ქაღალდი და ვარდის ფორმის ფუნთუშები თანაბრად გაანაწილეთ (დაიცავით მანძილი).
ღუმელი გააცხელეთ 180 გრადუს ტემპერატურაზე, გამოსაცხობად დასჭირდება 30-35 წუთი. გემრიელად მიირთვით!
