შემოგთავაზებთ ალუბლის არომატით გაჯერებული ხაჭოს დესერტის რეცეპტს. მინიმალური ინგრედიენტების საშუალებით შეძლებთ საოცრად გემრიელი და ბავშვებისთვის სასარგებლო დესერტის მომზადებას.
მოსამზადებლად დაგჭირდებათ შემდეგი ინგრედიენტები:
- ხაჭო 300 გრ
- შაქარი ნახევარი ჩ. ჭ.
- ალუბალი 1 ჩ. ჭ.
- კვერცხი 2 ცალი
- მანანი 3 ს. კ.
- კარაქი
მომზადების წესი:
- ალუბლობის დროს აუცილებელია, მოამზადოთ ეს გემრიელობა და ისიამოვნოთ. შეგიძლიათ გაყინული ხილიც გამოიყენოთ, მაგრამ, რა თქმა უნდა, ახალი და წვნიანი ალუბალი თქვენს ნამზადს უფრო მეტ არომატსა და სურნელს ჰმატებს.
- ალუბალი დაკურკეთ. კვერცხი და შაქარი კარგად ათქვიფეთ, დაამატეთ ხაჭო, მანანი და კიდევ ერთხელ ათქვიფეთ.
- აიღეთ 18-20 სმ დიამეტრის საცხობი ფორმა, წაუსვით კარაქი, ძირზე მოაწყვეთ ალუბლები, გადაიტანეთ მზა მასა და თანაბრად გაანაწილეთ.
- ღუმელი გააცხელეთ 180 გრადუს ტემპერატურაზე, გამოსაცხობად დასჭირდება 20-30 წუთი. გაგრილების შემდეგ მოაყარეთ შაქრის ფხვნილი და მორთეთ ალუბლებით.
გემრიელად მიირთვით!
