ყურძენი აქტიურად გამოიყენება კოსმეტოლოგიური ხაზით. პოლიფენოლებისა და ძლიერი ანტიოქსიდანტების შემცველობის წყალობით ყურძენი ეფექტურად ებრძვის თავისუფალ რადიკალებს, აფერხებს უჯრედის დაბერებას და ნაოჭებისა და ნაკეცების წარმოქმნას.
კანის მოვლის საშუალებების მოსამზადებლად გამოიყენება შავი ყურძნის ჯიშები, რადგან ისინი შეიცავს ბუნებრივ ნივთიერებას, რესვერატროლს (გვხვდება ყურძნის კანში), რომელსაც აქვს ანთების საწინააღმდეგო თვისებები და ზრდის უჯრედის სიცოცხლისუნარიანობას.
შემოგთავაზებთ ყურძნის ბაზაზე მომზადებული რამდენიმე უმარტივესი საშუალების რეცეპტს, რომელთა დახმარებითაც შეძლებთ გამოიყენოთ ყურძენი თქვენი კანის სილამაზისა და ჯანმრთელობისთვის.
ნაოჭების საწინააღმდეგო კოსმეტოლოგიური საშუალებების მოსამზადებლად გამოიყენება ყურძნის კანი, თუმცა თავად რბილობიც საკმაოდ ძლიერი პროდუქტია.
1. ყურძნის ნიღაბი
თვალებს ირგვლივ კანი საკმაოდ მგრძნობიარეა და გარე კუთხეების ირგვლივ გაჩენილი ხაზების, რომელსაც ,,ბატის თათებს“ ეძახიან, შესამცირებლად ან გასასწორებლად შემოგთავაზებთ ღამის ნატურალური კრემის რეცეპტს.
მალამოს მოსამზადებლად დაგჭირდებათ 2 მარცვალი მწვანე ყურძნის რბილობი და 2 კაფსულა E ვიტამინის შიგთავსი. მოცემული ინგრედიენტები აურიეთ და ნაზად შეიზილეთ თვალების ირგვლივ კანზე.
სასურველია, სამოქმედოდ დაიტოვოთ მთელი ღამე, დილით სახე თბილი წყლით დაიბანეთ.
2. დამატენიანებელი ნიღაბი
ყურძნის 10 მარცვალს დაამატეთ 6 ს. კ. გაფილტრული წყალი, 1 ს. კ. ლიმონის წვენი, 3-4 ს. კ. კივის წვენი და დააბლენდერეთ. მომზადებული მასა რამდენიმე საათით შედეთ მაცივარში. ნიღაბი თანაბრად გაინაწილეთ წინასწარ გაწმენდილ სახის კანსა და ყელზე. სამოქმედოდ დაიტოვეთ 30 წუთი. ნარჩენები თბილი წყლით ჩამოიბანეთ.
3. ყურძნის წიპწების გამაახალგაზრდავებელი ნიღაბი
ყურძნის წიპწის ზეთი გამაახალგაზრდავებელი ელექსირია, რომელიც სწრაფად და ეფექტურად ანიჭებს კანს ელასტიურობას.
ეს ზეთი შეიცავს C, D და E_ვიტამინებს, ბეტა-კაროტინს, ომეგა-3-ს, ომეგა-6-ს.
ნიღაბის მოსამზადებლად ყურძნის წიპწები დანაყეთ. მიღებული მასა გადაიტანეთ ქსოვილზე და გამოწურეთ ზეთი. მიიღებული ზეთი წაისვით კანზე და სამოქმედოდ დაიტოვეთ 15 წუთი. ნარჩენები თბილი წყლით ჩამოიბანეთ.
4. ტანის ნიღაბი
ყურძნის 20-25 მარცვალი დააბლენდერეთ, დაამატეთ ნახევარი ფინჯანი მწვანე თიხა და კარგად აურიეთ. ნიღაბი მსუბიქი წრიული მოძრაობებით შეიზილეთ კანზე. ნარჩენები ჩამოიბანეთ თბილი წყლით და საპნით.
